Leti...

Já, ég er búin að vera eitthvað löt við fréttaflutning úr Bretaveldi. Afsökunin er sú að ég er ekki búin að gera neitt að viti né lesið nein blöð og því haft voða lítið að segja!

Er líka búin að vera að vinna svona heldur mikið og ekki getað notið veðurblíðunnar....hef fekar verið að blóta veðrinu þar sem við erum ekki með loftkælingu á skrifstofunni. Um 4 leytið í eftirmiðdaginn er rakastigið orðið svo svakalegt að finnar yrðu kátir með að halda evrópumótið í sánusetu þar.

Talandi um veðrið (þar sem ég hef mest lítið annað að segja) horfði á fréttir frá Íslandi í liðinni viku og gat ekki annað en skellt uppúr við að sjá að bikiníin hafa verið tekin fram til notkunar í sólinni og 14 gráðunum! Einhvern tíman hefði ég sjálf látið mig hafa það að skella mér í bikiníið - en ekki lengur.

Annars erum við á leið til Skotlands í fyrramálið. Ég má víst búast við karlmönnum í pilsum, enda erum við að fara að vera viðstödd brúðkaup. Brúðguminn að fara að gifta sig í annað skiptið - og lýst mér vel á frúnna hans, enda tölfræðilega ólíklegra að þeir klúðri málunum í annað sinn. Svona er maður alltaf jákvæður, enda veðjaði ég á notaðan mann hahah