USA II - New York

Áður en ég sný mér að New York. Angel hafði skipulagt óvænta uppákomu fyrir verðandi eiginkonu sína á brúðkaupsdaginn og 5 mínútum áður en hún átti að ganga niður altarið bað hann okkur vinkonurnar að láta hana vita að hann hafði aðeins breytt dagskránni!!! Þessi líka rómantíski maður hafði bætt inní einu lagi og þegar Kristín birtist í gættinni ómaði úr hátölurunum "Here comes the Sun" með Bítlunum. Þvílíkt sætt!!

Allavega, við mættum í borgina sem aldrei sefur á mánudaginn.  Sólin skein og rakastigið var alveg þolanlegt, sér í lagi þar sem fréttir höfðu borist héðan úr UK að rignt hafði all svakalega meðan við vorum í burtu  Við ákváðum að taka bara túristann á þetta með Hildi og Ómari og stukkum um borð á ferðamannastrætónum. Í tveggja tíma rúnti um Manhattan áttuðum við okkur á því hvernig borgin lá og hvernig við best gætum forðast það að týnast á næstu dögum...okkur David tókst nú samt að villast í Greenwich Village - sem er að vísu eini hluti borgarinnar sem ekki er i hnitakerfinu.

- Skelltum okkur upp í Empire State Building. Lyftan rauk uppá 80 hæð á nokkrum sekúndum og taldi í tugum. David leið heldur illa en lifði það af. Við tók önnur lyfta sem fór með okkur uppá 86. hæð þaðan sem við gátum dáðst að borginni. Skyggnið var mjög gott og við sáum yfir alla Manhattan, yfir í Jersey City á hinum bakka Hudson og yfir Austuránna. Tókum fullt af myndum og svimaði smá. Mæli með að fara í morgunsárið, því þá eru engar raðir.

- Fórum niður á Ground Zero, þar sem áður höfðu staðið tvíburaturnarnir. Þeir eru þegar hafnir vinnu á nýjum turni sem gnæfa á yfir New York. Ég var ánægð með kanann þarna. Staðurinn sjálfur svo mikilfenglegur að maður fær gæsahúð og tár í augun, og þarf því ekki annað en þennan litla minnisvarða sem þarna stendur.  

- Húsið við hliðina á Ground Zero vakti athygli mína. Þeir eru enn að reyna að átta sig á því hvernig best er að rífa það. Byggingin eyðilagðist í sprengingunum, en það er svo mikið asbestos í því sem er náttúrulega algert eitur. Þeir eru enn að finna bein og líkamsparta utan á byggingunni

Farin í bíó...meira bráðum.